ԱՄԷ-ն «փակվում է», Եգիպտոսը հարստանում. պատերազմը փոխեց հայ զբոսաշրջիկների պլանները

Արաբական Միացյալ Էմիրություններ ուղղությունը պատերազմի հետևանքով հիմա շատ պասիվ է։ Այս մասին Փաստինֆոյի հետ զրույցում ասել է «Լոռե թրավել» տուրիստական ընկերության հիմնադիր տնօրեն Վլադիմիր Գևորգյանը, նշելով, որ անընդհատ չեղարկվում են չվերթերը, ժամեր են փոխվում, օրեր են փոխվում, որի հետևանքով շատ մարդիկ ձեռնպահ են մնում ԱՄԷ մեկնելուց։

Նա հավելել է, որ խնդիրները տարածվում են նաև այլ ուղղությունների վրա, քանի որ ԱՄԷ-ն հաճախ ծառայում է որպես տարանցիկ հանգույց։

«Պատերազմի ազդեցությունը կա նաև այլ ուղղությունների հետ կապված, որովհետև ԱՄԷ-ն Հայաստանի զբոսաշրջիկների համար նաև որոշակի առումով տուրիստական հաբ էր, այսինքն այնտեղից մեկնում էին այլ ուղղություններ՝ Ինդոնեզիա, Մալդիվներ, Բալի»,– ընդգծել է նա։

Գևորգյանի գնահատմամբ՝ այս տարի ամենապահանջված ուղղությունը դարձել է Եգիպտոսը։

«Եգիպտոսի փաթեթները ինչքան էլ մատչելի են, կա գնային աճ, ես դա պայմանավորում եմ նաև ԱՄԷ-ի իրավիճակով, նաև ընդհանրապես աշխարհում գնաճի հետ կապված»,– ասել է նա։

Նա նաև նշել է, որ անցյալ տարվա համեմատ փոխվել են պահանջարկի միտումները։

«Եթե անցած տարի ամենապահանջված ուղղություններից մեկը Կիպրոսն էր, այս տարի ևս պահանջված է, սակայն քանի որ վիզաները տրամադրում է վիզաների կենտրոնը, այստեղ ևս ունենք խնդիրներ, որի պատճառով շատերը չեն ցանկանում մեկնել»։