Դատախազը հաստատել է եպիսկոպոսների ու Վեհափառի գործով մեղադրական եզրակացությունը և այն ուղարկել դատարան

Դատախազը հաստատել է Մայր Աթոռ Սուրբ Էջմիածնի վեց եպիսկոպոսների ու Ամենայն Հայոց Կաթողիկոսի գործով մեղադրական եզրակացությունը և այն ուղարկել դատարան։

Այս մասին հայտնել են ՀՀ գլխավոր դատախազությունից։

Նշենք՝ դատարանը որոշել է, որ Մակար եպիսկոպոս Հակոբյանի, Հովնան եպիսկոպոս Հակոբյանի ու Նաթան արքեպիսկոպոս Հովհաննիսյանի նկատմամբ քրեական հետապնդումը ենթակա է դադարեցման։

Սրբազան Հայրերի փաստաբան Արմինե Ֆանյանն Այսօր․ամ-ի հետ զրույցում ասել է, որ, ի սկզբանե, այս հետապնդումն ակնհայտ ապօրինի էր, արտացոլում է եկեղեցու ներքին գործերին պետության անհամաչափ միջամտությունը, որի լիազորությունն ու իրավասությունը չունի որևէ պաշտոնատար անձ։

Փաստաբանի խոսքով՝ գործը հապճեպորեն դատարան ուղարկելը խոսում է այն մասին, որ պետությունը շարունակում է իր վարքագիծն ու դասեր չի քաղում դատարանների որոշումներից։

Հիշեցնենք՝ Մայր Աթոռ Սուրբ Էջմիածնի վեց եպիսկոպոսներ մեղադրյալի կարգավիճակում են. նրանք մեղադրվում են դատական ակտի կատարմանը խոչընդոտելու համար, որով պահանջվում է, որ Արման Սարոյանը վերականգնվի Մասյացոտնի թեմի առաջնորդի պաշտոնում։

Քննչական կոմիտե էին հրավիրվել Մակար, Հովնան, Նաթան, Հայկազուն, Մուշեղ և Վահան Սրբազանները։ Նրանց նկատմամբ խափանման միջոց է ընտրվել բացակայելու արգելքը։

Ավելի ուշ՝ Ավստրիայում կայանալիք Եպիսկոպոսաց ժողովից երկու օր առաջ, քրեական գործ հարուցվեց նաև Վեհափառ Հայրապետի նկատմամբ ու արգելվեց Կաթողիկոսին լքել երկիրը:

Մարտի 13-ին Գերագույն հոգևոր խորհրդի անդամներին կրկին կանչել էին ՀՀ քննչական կոմիտե, որ լրացուցիչ ցուցմունք տան, իսկ դրանից մեկ օր առաջ էլ Գերագույն հոգևոր խորհրդի աշխարհիկ անդամներին էին կանչել Քննչական կոմիտե։

Հունվարի 27-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի նախագահությամբ Մայր Աթոռ Սուրբ Էջմիածնում տեղի էր ունեցել Գերագույն հոգևոր խորհրդի ժողով, որի ընթացքում Գերագույն հոգևոր խորհուրդը առաջարկ էր ներկայացրել Ամենայն Հայոց Կաթողիկոսին Գևորգ եպիսկոպոս Սարոյանին հռչակել կարգալույծ։ Ավելի ուշ Մայր Աթոռը հաղորդակցություն տարածեց, որ հայրապետական տնօրինությամբ՝ կարգալույծ է հռչակել Տ․ Գևորգ եպիսկոպոս Սարոյանը։