Ուժեղ Հայաստան»-ը ԱԺ փոխնախագահի, ԱԺ հանձնաժողովների նախագահների մասին կհայտարարի Ազգային ժողովի նիստից մի քանի ժամ առաջ

 

Այս մասին այսօր՝ 2026 թվականի հուլիսի 31-ին, լրագրողների հետ զրույցում հայտարարել է կուսակցության առաջնորդ Նարեկ Կարապետյանը։

 

Նարեկ Կարապետյանը հրաժարվել է հստակեցնել, թե խորհրդարանական որ հանձնաժողովների նախագահների պաշտոններին է հավակնում իրենց խմբակցությունը: Նա բացատրել է, որ սա արվում է իշխող մեծամասնության կողմից հնարավոր հակաքայլերը կանխելու համար. «Մտածում ենք՝ եթե հիմա ասենք, «Քաղաքացիական պայմանագիրը» կվերցնի հենց այդ հանձնաժողովները»:

 

Խոսելով առաջնահերթությունների մասին՝ ընդդիմադիր գործիչն ընդգծել է, որ իրենց թիրախում լինելու են այնպիսի ոլորտներ, որոնք թույլ կտան առավելագույնս վերահսկել գործադիր իշխանության քայլերը. «Պետք է լինեն այնպիսի հանձնաժողովներ, որոնք կվերահսկեն իրենց (իշխանության) գործողությունները»: Ըստ փորձագետների՝ խոսքը վերաբերում է հատկապես Պաշտպանության և անվտանգության կամ Մարդու իրավունքների պաշտպանության հանձնաժողովներին:

 

Հունիսի 7-ի ընտրություններից հետո ձևավորված նոր խորհրդարանում ընդդիմադիր «Ուժեղ Հայաստան» խմբակցությունը, ըստ Դոնթի բանաձևի, ունի ԱԺ փոխնախագահի և մի քանի մշտական հանձնաժողովների նախագահների թեկնածուներ առաջադրելու օրինական իրավունք: