Ռուսաստանում ավելի քան երկու անգամ կընդլայնեն օտարերկրացիներին երկրից վտարելու հիմքերի ցանկը

Նոյեմբերի 3-ից Ռուսաստանում ավելի քան երկու անգամ կընդլայնվի այն իրավախախտումների ցանկը, որոնց համար օտարերկրյա քաղաքացիները կարող են վտարվել երկրից։ Վարչական իրավախախտումների վերաբերյալ օրենսգրքի համապատասխան հոդվածների թիվը 22-ից կհասնի 45-ի։ Այս մասին հայտնել է Պետդումայի նախագահ Վյաչեսլավ Վոլոդինը, փոխանցում է ՏԱՍՍ-ը։

Նրա խոսքով՝ վտարումը կարող է կիրառվել որպես լրացուցիչ պատիժ այնպիսի իրավախախտումների համար, ինչպիսիք են ոստիկանության աշխատակցի կամ զինծառայողի օրինական պահանջին չենթարկվելը, խտրականությունը և հասարակական կարգի խախտումը։

Վոլոդինը ներկայացրել է նաև նոյեմբերին ուժի մեջ մտնող այլ փոփոխություններ։ Նոյեմբերի 1-ից կընդլայնվեն մասնագիտացված համակարգի միջոցով պետական և համայնքային վճարումներ կատարելու հնարավորությունները՝ առանց վավերապայմանները ձեռքով մուտքագրելու։ Դաշնային գանձապետարանը նաև պարտավոր կլինի կատարված վճարումների մասին տեղեկությունները փոխանցել պետական տեղեկատվական համակարգ՝ վճարման հանձնարարականը կատարման ընդունելուց հետո առավելագույնը մեկ ժամվա ընթացքում։

Նոյեմբերի 2-ին կավարտվի սուբսիդավորվող և արտոնյալ չվերթների ավիատոմսեր գնելիս արտոնությունների տրամադրման ավտոմատացման փորձարկումը։ Ակնկալվում է, որ դա թույլ կտա ավելի արագ հաստատել ուղևորների՝ արտոնությունից օգտվելու իրավունքը։

Նոյեմբերի 26-ից կընդլայնվեն այն հիմքերը, որոնցով վարկային պատմությունների բյուրոները կկարողանան տրամադրել վարկային հաշվետվություններ։ Բացի այդ, բյուրոները պարտավոր կլինեն Դատական հարկադիր կատարողների դաշնային ծառայության հարցմամբ տեղեկություններ փոխանցել՝ ժամկետանց պարտքերի բռնագանձման կանոնների հնարավոր խախտումները ստուգելու համար։